1. Dreifingarþættir
1.1 Dagblöð, blöð, tímarit og áritaður bréfapóstur
Bréfasendingar geta bæði verið áritaðar með nafni viðtakanda eða óáritaðar, þ.e. fríblöð og fjölpóstur.
1.1.1 Skilgreining dagblaða, blaða, tímarita og áritaðs bréfapósts
Dagblöð, blöð og tímarit hvort sem þau eru árituð með nafni viðtakanda eða óárituð eru skilgreind sem ritstýrt efni, þar sem fram kemur titill, númer tölublaðs, árgangur blaðsins og ábyrgðarmaður dreifingarefnis. Þá skulu sendingarnar vera allar eins í lögun, hámarksstærð er 280×420×25 mm og ekki þyngri en 1000 g.
Póstdreifing áskilur sér rétt til að hafna dreifingu á blöðum, tímaritum og markpósti ef innihald þess særir blygðunarkennd eða er á einhvern hátt siðlaust.
1.1.2 Áritaðar bréfasendingar: Dagblöð, blöð, tímarit og árituð bréf
Dagblöð, blöð og tímarit og bréf eru áritaðar bréfasendingar sem eru merktar með nafni viðtakanda, heimilisfangi, póstnúmeri og stað. Viðtakandi bréfasendingar getur verið einstaklingur, fyrirtæki, félagasamtök, stofnanir eða aðrir lögaðilar. Sendingarnar þurfa allar að vera eins að stærð og lögun, hámarksstærð er 280×420×25 mm.
1.1.2.1 Afhending og dreifingarsvæði
Dreifingarsvæði Póstdreifingar er höfuðborgarsvæði og Akureyri (pnr: 101–113, 170, 200–221, 225, 270, 600 og 603) auk helstu þéttbýlisstaða á landsbyggðinni.
Dreifing til heimila fer fram sex daga vikunnar, mánudag til laugardags, og er að jafnaði lokið fyrir klukkan sjö á morgnana.
Póstdreifing áskilur sér rétt til lengri dreifingartíma ef nauðsyn krefur sökum utanaðkomandi þátta sem ekki er hægt að hafa áhrif á, eins og „force majeure“, seinkun í prentsmiðju, veikindi blaðbera o.s.frv.
Önnur dreifisvæði en talin eru upp hér að ofan fara í gegnum þriðja aðila, gilda þá viðskiptaskilmálar viðkomandi aðila.
1.1.2.2 Verð og bókun dreifinga
Verð og afsláttarkjör taka mið af tíðni, magni og þyngd.
Bóka þarf dreifingu hjá sölu- eða þjónustufulltrúum Póstdreifingar í síma 585 8300 eða með tölvupósti á netfangið sala@postdreifing.is. Ekki er hægt að ábyrgjast að sendandi fái umbeðinn dreifingardag.
1.1.2.3 Skil á efni til dreifingar
Skila þarf efni til dreifingar til póstmiðstöðvar Póstdreifingar a.m.k. 2–3 virkum dögum fyrir áætlaðan dreifingardag, nema um annað sé samið.
Ekki er hægt að ábyrgjast umsaminn dreifingardag ef töf er á afhendingu.
1.1.2.4 Hverfisnúmer á áritaðar bréfasendingar
Til viðbótar við nafn, heimilisfang, póstnúmer og stað þarf að árita sérstök hverfisnúmer á allan áritaðan póst. Póstdreifing veitir sendendum upplýsingar um hverfisnúmer áður en áritun fer fram.
Senda skal Póstdreifingu lista yfir viðtakendur á rafrænu formi (excel) áður en áritun fer fram. Aðgreina skal í sérstökum dálkum viðtakanda, götuheiti, húsnúmer, póstnúmer og stað. Póstdreifing bætir hverfisnúmerum við listann og afhendir sendanda aftur á tölvutæku formi til áritunar, í þeirri röð sem bréfasendingarnar skulu berast til póstmiðstöðvar.
Ekki er hægt að dreifa árituðum bréfasendingum ef hverfisnúmer vantar.
1.1.2.5 Endursendingar
Ef ekki tekst að koma árituðum bréfasendingum til skila, t.d. ef viðtakandi er fluttur eða er með ómerkta póstlúgu, er sending endursend til sendanda.
1.1.2.6 Þyngdarflokkar
- 0–50 g
- 51–250 g
- 251–1000 g
1.2 Fjölpóstur
Fjölpóstur er óáritað auglýsinga- og kynningarefni sem er eins að efnistökum, lögun og þyngd.
1.2.1 Skilgreining fjölpósts
Fjölpóstur getur verið margskonar óáritað (ekki áritað með nafni viðtakanda) auglýsinga- og kynningarefni sem er dreift til heimila. Nafn fyrirtækis eða ábyrgðarmanns þarf að koma fram á fjölpóstinum.
Fjölpóstur er póstlagður allur á sama tíma eða eftir samkomulagi hverju sinni. Hægt er að dreifa fjölpósti til heimila á höfuðborgarsvæðinu (pnr: 101–113, 170, 200–221, 225, 270).
Póstdreifing áskilur sér rétt til að hafna dreifingu á fjölpósti ef innihald hans særir blygðunarkennd eða er á einhvern hátt siðlaust.
1.2.2 Afhending og dreifingarsvæði
Fjölpósti er að jafnaði dreift til heimila á tímabilinu kl. 21:00–7:00.
Póstdreifing áskilur sér rétt til lengri dreifingartíma ef nauðsyn krefur sökum utanaðkomandi þátta sem ekki er hægt að hafa áhrif á, eins og „force majeure“, seinkun í prentsmiðju, veikindi blaðbera o.s.frv.
Fjölpósti er dreift á fimmtudögum á höfuðborgarsvæðinu (pnr. 101–113, 170, 200–221, 225, 270).
1.2.3 Verð og bókun dreifinga
Bóka þarf dreifingu á fjölpósti hjá sölu- eða þjónustufulltrúum Póstdreifingar. Ekki er hægt að ábyrgjast að sendandi fái umbeðinn dreifingardag.
Semja þarf um afslátt áður en dreifing fer fram, afsláttarkjör taka mið af tíðni, magni, þyngd og dreifingardegi fjölpóstsins.
1.2.4 Skil á efni til dreifingar
Fjölpóst skal afhenda í póstmiðstöð eigi síðar en 2–3 dögum fyrir áætlaðan dreifingardag.
Berist efni eftir tilskilinn afhendingarfrest áskilur Póstdreifing sér rétt til að innheimta sérstakt gjald í samræmi við þann kostnað sem hlýst af yfirvinnu.
Ekki er hægt að ábyrgjast umsaminn dreifingardag ef töf er á afhendingu.
1.2.5 Þyngdarflokkar
- 0–25 g
- 26–50 g
- 51–75 g
- 76–100 g
- 101–150 g
- 151–200 g
- 201–250 g
2. Plastpökkun og áritun
Póstdreifing tekur að sér plastpökkun og áritun póstsendinga. Áritun er laserprentuð á plastið.
2.1 Stærðarmörk
- Minnsti prentgripur sem hægt er að plasta er um 16 cm á lengd og 18 cm á breidd.
- Lágmarksþykkt er breytileg, en fer eftir stífleika prentgrips.
- Stærsti prentgripur sem hægt er að plasta er um 21 cm á lengd og 29,7 cm á breidd.
- Hámarksþykkt á prentgrip er u.þ.b. 2,5 cm.
2.2 Aukaefni sett með
Ábyrgðarmaður prentgrips getur óskað eftir því að settur sé aukamiði/aukaprentgripur með í plöstunina.
2.3 Þykkt á plasti
Plast sem er notað við plastpökkun póstsendinga er á bilinu 0,017 til 0,030 mm.
2.4 Afhendingartími
Afhending er háð fjölda eintaka og verkefnastöðu hvers tíma. Sölu- og þjónustufulltrúar geta gefið upp áætlaðan afhendingartíma fyrir hvert verkefni.
2.5 Bókun verkefna
Bóka þarf fyrirfram plastpökkun og/eða áritun póstsendinga hjá sölu- eða þjónustufulltrúum Póstdreifingar.
2.6 Afhending á plöstunarverkefnum
Afhenda skal póstsendingar til plastpökkunar og áritunar í póstmiðstöð Póstdreifingar, Hádegismóum 2, 110 Reykjavík.
3. Annað
3.1 Afþakkað dreifingarefni
Heimili geta afþakkað fjölpóst og fríblöð hjá dreifingardeild Póstdreifingar, viðkomandi fær sendan límmiða með merkingunni: „Afþakka fjölpóst“, „Afþakka fríblöð“ og „Afþakka fríblöð og fjölpóst“. Ekki eru bornar út póstsendingar til aðila sem með skýrum hætti afþakkar móttöku þeirra.
3.2 Gæðastefna Póstdreifingar
Póstdreifing leggur áherslu á að veita viðskiptavinum sínum hagkvæma og góða póstþjónustu. Sjá gæðastefnuna í heild á síðunni Gæða- og jafnlaunavottun.
3.3 ISO vottuð starfsemi
Starfsemi Póstdreifingar er gæðavottuð samkvæmt ISO 9001 staðlinum, vottunin staðfestir að gæðakerfi fyrirtækisins uppfylli kröfur staðalsins. Vottun á gæðastjórnunarkerfinu nær til allra helstu þjónustuþátta.
Tilgangurinn með að hafa virkt gæðastjórnunarkerfi er að tryggja að þjónusta Póstdreifingar sé í samræmi við viðskiptaskilmála, það rammar inn starfsemina og eflir stjórnun og rekstur. Þá eru allir verkferlar skýrir og allir starfsmenn Póstdreifingar hafa aðgang að gæðahandbók fyrirtækisins. Þá er áhersla lögð á mikilvægi þess að vakta og greina reksturinn til að skila samfelldum umbótum.